Медициналық сақтандыру

Медициналық сақтандыру қорына 7,7 млрд. теңгесін Жамбыл облысының жұмыс берушілері қызметкерлері үшін аударды
 
2017 жылдың 1 шілдесі мен 2020 жылдың 28 ақпан аралығында Міндетті әлеуметтік медициналық сақтандыру қорына түскен жалпы сомма 276,7 млрд.теңгені құрады. Оның 260,1 млрд.теңгесі (шамамен 94%) жұмыс берушілердің аударымдары болса, қалған 16,6 млрд.теңге (6% жуығы) – жеке кәсіпкерлер мен азаматтық-құқықтық келісімшарт негізінде еңбек ететін тұлғаларға тиесілі. 2017 жылдың 1 шілдесінен 2020 жылдың 28 ақпанына дейін Жамбыл облысында Қорға 8,1 млрд. теңгеден астам қаражат аударылды. Оның 7,7 млрд теңгесін жұмыс берушілер қызметкерлерге төледі. Аймақтық тұрғыдан алғанда, жарна төлеу жағынан бұрынғыша Алматы, НұрСұлтан қалалары мен Қарағанды облысы көш бастап тұр. Сондай-ақ, жыл басынан бері өзін-өзі жұмыспен қамтыған жамбылдық 21 441 адам 17,8 млн. теңге көлемінде бірыңғай жиынтық төлем төлеген. Естеріңізге сала кетсек, бірыңғай жиынтық төлем 2019 жылдың 1 қаңтарынан бастап енгізілген болатын. Жиынтық төлемнің ішінде өзге әлеуметтік төлемдерге қоса сақтандыру жарнасы да бар. Ол жалпы соманың 40 процентін құрайды. БЖТ – республикалық маңызы бар қалалар үшін 1 айлық есептік көрсеткіш (АЕК) немесе 2651 теңге, ауылдық жерлер үшін – 0,5 АЕК немесе 1326 теңге көлемінде белгіленген.
2020 жылдың 31 наурызына дейін Қазақстан Республикасының әрбір азаматы міндетті медициналық сақтандыру жүйесінде медициналық көмек алуға құқылы, яғни «шартты түрде сақтандырылған». Міндетті әлеуметтік медициналық сақтандыру жүйесінде медициналық көмек алу құқығына ие болу үшін жеке тұлғалар медициналық көмек алған күнге дейін қатарынан үш айдан кем емес уақыт ішінде Қорға жарналар төлеуге міндетті. Азамат соңғы төлемнен бастап 3 ай сақтандырылады. Сақтандырылушының мәртебесі болмаған жағдайда, тәуелсіз төлеуші ретінде азамат жыл басынан бастап төленбеген кезең үшін төлеммен айына 5% (2 125 теңге) төлей алады. Тұрғындарға ыңғайлы болу үшін барлық алғашқы медициналық көмек ұйымдарында МӘМС-ке жарна төлеуге арналған өзіне-өзі қызмет көрсету терминалдары орнатылды, мұндай құрылғылары міндетті медициналық сақтандыру жүйесінде медициналық қызметке мұқтаж сақтандырылмаған адамға медициналық мекеме ғимаратынан шықпай-ақ терминал арқылы төлем жасауға мүмкіндік береді.
 
М.БОКАЕВА, «Әлеуметтік медициналық сақтандыру қоры» КЕАҚ Жамбыл облысы бойынша филиалының директоры

*******

Жамбыл облысының медицина ұйымдарының халыққа көрсетілген қызметтері үшін 39 млрд. теңгеден астам қаржы төленді.

«Әлеуметтік медициналық сақтандыру қоры» КЕАҚ 2018 жыл басынан бері халыққа тегін қызмет көрсеткен медицина ұйымдарына 662,4 млрд. теңге төледі.

«Биылғы жылдың 10 желтоқсандағы мәліметке сүйенсек, жалпы Қазақстан бойынша Қормен келісімшарт бекіткен жеткізуші компанияларға 662,4, млрд. теңге төленді. Бұл кепілдендірілген тегін медициналық көмек пакеті (ТМККК) шеңберінде бекітілген келісімшарт сомасының 83% пайызын құрайды. Жамбыл облысы бойынша Қормен келісімшарт бекіткен жеткізуші компанияларға 39,0, млрд. теңге төленіп, бұл кепілдендірілген тегін медициналық көмек пакеті (ТМККК) шеңберінде бекітілген келісімшарт сомасының 84,9 пайызын құрады» – деп, түсіндірді «Әлеуметтік медициналық сақтандыру қоры» КЕАҚ Жамбыл облысы бойынша филиалының директоры Мавлюда Бокаева.

«Жұмыс кестеге сай жүріп жатыр, бөлінген қаражат медицина мекемелерінің операциялық шығындарын өтеуге жеткілікті», – деді                          М. Бокаева.

Бүгінгі таңда, жалпы Қазақстан бойынша Қор мемлекеттік тапсырыс бойынша 1375 медицина ұйымымен келісімшарт бекіткен. Оның 642-і – жеке меншік. Биыл жеке клиникалар саны 2017 жылмен салыстырғанда 171-ге артқан.

Қазіргі уақытта Жамбыл облысында 87 медицина ұйымдары қордың жеткізушілері болып табылады, оның 47-і жекеменшік. Қордың барлық жеткізушілер тізімін fms.kz сайтында «Клиниканы таңдау» бөлімінен алуға болады.